Vo firaq aur wo visal kahaN vo shab-o-roz-o-mah-o-sal kahaN | Mirza Assadullah Khan Galib

Vo firaq aur wo visal kahaN 
vo shab-o-roz-o-mah-o-sal kahaN

fursat-e-karobar-e-shauq kise 
zauq-e-nazzara-e-jamal kahaN

dil to dil vo dimaG bhi na raha 
shor-e-sauda-e-Khat-o-Khal kahaN

thi wo ik shakhs ke tasavvur se 
ab vo raNnai-e-Khayal kahaN

aisa asaN nahin lahu rona 
dil men taqat jigar men hal kahaN

hamase chuTa qimarKhana-e-ishq 
vaN jo jayeN girah men mal kahaN

fikr-e-duniya men sar khapata huN 
main kahaN aur ye vabal kahaN



By: Mirza Assadullah Khan Galib


Popular Posts